विदेशमा

निःशुल्क भएसँगै गुगल मिटका प्रयोगकर्ता बढे, १५ दिनमै ५ करोड डाउनलोड

20/05/2020

एजेन्सी । गुगलको भिडियो कन्फ्रेसिङ्ग एप गुगल मिट निःशुल्क भएपछि यसको प्रयोगकर्ताको संख्या पनि ह्वात्तै बढेको छ । प्रयोगकर्ता बढेपछि कम्पनी पनि यस एपप्रति धेरै नै उत्साहित बनेको छ । यो एप निःशुल्क भएको १५ दिनमै यसको डाउनलोडको संख्या पाँच करोड पुगेको छ ।

गुगल मिट एप पहिलो भने निःशुल्क थिएन । यसको प्रयोग तिनै कम्पनीका कर्मचारी मात्र गर्दथे जहाँ जी सुटको प्रयोग हुन्थ्यो । २९ अप्रिलमा गुगलले मिट एपलाई निःशुल्क गर्ने निधो गर्यो अनि ६ मे मा यसको अपडेट गर्यो । अब भने गुगल मिट आफ्नो जिमेल आइडीबाटै एक्सेस गर्न सकिन्छ ।

लगडाउनमा भिडियो कन्फ्रेसिङ्गको माग धेरै नै बढेको छ । विश्वका कलेज÷स्कूलका क्लास भिडियो कन्फ्रेसिङ्गबाटै भइरहेका छन् । यसको साथै धेरै व्यक्तिहरु घरबाट टाढा लकडाउनका कारण विभिन्न स्थानहरुमा फँसेका छन् । उनीहरुको साहारा पनि सामाजिक सञ्जालमार्फत भिडियो संवाद नै हुने गरेको छ ।

जी सुट प्रयोग नगर्नेहरुका लागि पनि गुगल मिट उपलब्ध छ । एपब्रेनको रिपोर्ट अनुसार मार्चको पहिलो हप्तामा गुगल मिटको डाउनलोडिङ लगभग ५० लाख थियो तर २० दिनमा यसको डाउनलोडिङ एक करोड पुग्यो भने प्ले–स्टोरबाट भने यो करोड पटक डाउनलोड भएको छ ।

गुगल मिटको सिधा प्रतिस्पर्धा अब म्यासेन्जर रुम र जुम एपसँग हुने भएको छ । गुगल मिटबाट एकै पटक २ सय ५० जनासँग भिडियो मिटिङ गर्न सकिन्छ । तर फेसबुकको म्यासेन्जर रुपबाट धेरैमा ५० जनासँग मात्र एक साथ भिडियो मिटिङ गर्न मिल्छ । म्यासेन्जर रुमलाई अब चाँडै नै व्हाट्स्एपको वेभले साथ दिने भएको छ ।

कोरोना भाइरसका कारण भएको लकडाउनमा जुम एपले पनि धेरै नै चर्चा पाएको छ । यस कम्पनीले यो एपले यति धेरै मानिसहरुका बीच चर्चा बटुल्छ भन्ने हेक्का राखेको थिएन । यसका पाँच लाख एकाउण्ट ह्याक भएपछि यसको सुरक्षाप्रति प्रश्न उठेको छ । यद्दपि यसको प्रयोगकर्ता पनि धेरै नै रहेका छन् ।